કાવ્ય-આચમન શ્રેણી – સુરેશ દલાલ/જિંદગી

૪૨. જિંદગી

કઠપૂતળીનો નાચ
જિંદગી કઠપૂતળીનો નાચ.
ક્યાંક અરીસા, ક્યાંક પ્રતિબિંબ, ક્યાંક બટકણા કાચ.

હું નાચું પણ કોઈ નચાવે,
કોઈ નચાવે ને હું નાચું;
ચારે બાજુ બંધન બંધન
મુક્તિધામને મનથી યાચું
હું સાવ અજાણી લિપિ
વિધાતા! આંખ ખોલીને વાંચ.
⁠— જિંદગી કઠપૂતળીનો નાચ.

સૂરના કંટક એવા વાગે
જંજીર જેવાં ઝાંઝર લાગે
ભ્રમણાની આ દુનિયા
એમાં શું ખોટું શું સાચ
⁠— જિંદગી કઠપૂતળીનો નાચ.

પ્રેમની શીતળ શીતળ છાયા
પણ રૂપરૂપની સહુને માયા
પ્રાણ મૂંગો ને કાયા બોલે
અહીં અગ્નિ ને આંચ
⁠— જિંદગી કઠપૂતળીનો નાચ.

૩-૭-૧૯૮૬⁠(કાવ્યસૃષ્ટિ, પૃ. ૮૭૨-૮૭૩)