અર્વાચીન ગુજરાતી કાવ્યસંપદા/યોગેશ જોષી/આજ તો મને સોળમું બેઠું

આજ તો મને સોળમું બેઠું

યોગેશ જોષી

આજ તો મને સોળમું બેઠું...
આભ આખુંયે ઊતરી હેઠું, હૈયે પેઠું!

હૈયે મારા દરિયા સાતે
ઊછળે રે લોલ;
મોજાં એનાં આઠમા આભે
પૂગે રે લોલ!
ચાંદો-સૂરજ હાથમાં મારા, કંઈ ના છેટું!
આજ તો મને સોળમું બેઠું...

આજ મારામાં ઘાસ જેવું કૈં
ફૂટતું રે લોલ;
કોણ મારામાં ફૂલ જેવું કૈં
ચૂંટતું રે લોલ!
મેઘ-ધનુ આ પણછ ખેંચી; હૈયે પેઠું!
આજ તો મને સોળમું બેઠું...

લોહીમાં સૂતા નાગ ફૂંફાડા
મારતા જાગે;
ખબકારાયે મેઘની માફક
આજ તો વાગે!
ક્યાં લગ સખી, ઊમટ્યાં વાદળ વેઠું?
આજ તો મને સોળમું બેઠું...
(ગુજરાત, દીપોત્સવી, ૨૦૬૦)