સાહિત્ય પલ્લવ – ભાગ ૧/આજ

૨. આજ

પ્રહ્લાદ પારેખ

આજ અંધાર ખુશબોભર્યો લાગતો,
⁠આજ સૌરભભરી રાત સારી;
આજ આ શાલની મંજરી ઝરી ઝરી
⁠પમરતી પાથરી દે પથારી. આજ૰
આજ ઓ પારથી ગંધને લાવતી,
⁠દિવ્ય કો સિંધુની લહરી લહરી;
આજ આકાશથી તારલા માંહીથી
⁠મહેકતી આવતી શી સુગંધી? આજ૰
ક્યાં, કયું પુષ્પ એવું ખીલ્યું જેહના
⁠મઘમઘાટે નિશા આજ ભારી?
ગાય ના કંઠ કો, તાર ના ઝણઝણે,
⁠ક્યાં થકી સૂર કેરી ફુવારી? આજ૰
હૃદય આ વ્યગ્ર જે સૂર કાજે હતું
⁠હરિણ શું, તે મળ્યો આજ સૂર?
ચિત્ત જે નિત્ય આનંદને કલ્પતું,
⁠આવિયો તે થઈ સુરભિ-પૂર? આજ૰
[‘બારી બહાર’માંથી]

સ્વાધ્યાય

૧. સાચાં ફૂલોને શાં શાં નુકસાન છે (બનાવટી ફૂલોની સરખામણીમાં)? અને લાભ શા શા છે?

૨. તમને ગમતી કડી સવિસ્તર સમજાવો.

૩. ‘આજ’ મોઢે કરો. એના શબ્દોમાંથી સંગીત-એટલે કે સુરાવટ-તમને મળે છે?

૪. ‘બનાવટી ફૂલ’ ઉપર નિબંધ લખો.