ગુજરાતી નારીસંપદા : કવિતા/શાને ઊગ્યો?

શાને ઊગ્યો?

જયમનગૌરી પાઠકજી

⯐

***

કિરણોમાં કોડ કેમ પાઠવ્યા,
⁠મારે વસવાં આ ધરતીને અંક રે
⁠ચંદ્રમા! શાને ઊગ્યો રે?

આશા ઉગાડી કેમ ઊગતાં
⁠અલ્યા જાણે ન માનવીના રંગ રે
⁠ચંદ્રમા! શાને ઊગ્યો રે?

વદને સુધારસ તારે ભર્યા,
⁠મન મારે ભર્યા વિખવાદ રે
⁠ચંદ્રમા! શાને ઊગ્યો રે?

શીળી ઊર્મિઓ ઉછાળે મહેરામણ
⁠વડવાનલો મારે અંતરે
⁠ચંદ્રમા! શાને ઊગ્યો રે?

વધે ઘટે ને વળી પાછો વધે
⁠મારે વૃદ્ધિ પછી હા! મોત રે
⁠ચંદ્રમા! શાને ઊગ્યો રે?

જયોતિ તું જયોત અનંતની,
⁠મારે માયામાં છાયા અંધાર રે
⁠ચંદ્રમા! શાને ઊગ્યો રે?