ધીરેન્દ્ર મહેતાની કવિતા/કક્કો બારાખડી

૫૩.
કક્કો-બારાખડી

⁠વેણુબેન શીખે કક્કો-બારાખડી,
⁠અક્ષરો તો પાટી ઉપર કરતા અથડાઅથડી!

ખભે લાકડી લઈને આવ્યો આ બાજુએ ક,
લાકડી ઝૂંટવી લીધી તો બની ગયો એ ડ,
શું થયું કે મોઢું ફેરવી ચાલ્યો ગયો ટ;
પૂંછડી વાળી સામસામા આવ્યા ઠ ઢ.
ગુલાંટ ખાય કોઈ અને કોઈ પડે આમ લથડી,
અક્ષર ધાંધલ-ધમાલ કરતા કરતા અથડાઅથડી!

જિરાફ પેઠે ઊંચી ડોકે આવ્યા ચ ને ફ,
હાથી પેઠે ઊંચી નીચી સૂંઢે બ ને ભ;
ઊંટ થઈને આવ્યા કેવા જુઓ ય ને થ;
ર-ની પૂંઠે તીર તાકતો ઊભો જુઓ લ.
ગભરાઈ ઊઠ્યાં વેણુબેન ને પાટી ગઈ લ્યો પડી!

⁠વેણુબેન શીખે કક્કો-બારાખડી.
૪-૨-’૮૨