ધીરેન્દ્ર મહેતાની કવિતા/ફરફરતો આનંદ

૮.
ફરફરતો આનંદ

⁠શ્વાસમાં વાગે શંખ,
⁠એ જી રે શ્વાસમાં વાગે શંખ...

ઘડિયા-ચોઘડિયાની વાત નથી આ કાંઈ
ઘડીએ ઘડીની છે વાત;
ફૂંકની પેર હું તો ફૂંકાતો ચાલું ને
ફેલાતી ચાલે મારી જાત!
રૂંવારૂંવામાં ઝાલર બજે ને ગવાય રૂડા છંદ!
⁠હો જી હો ગવાય રૂડા છંદ...
⁠એ જી રે વાસમાં વાગે શંખ!

બત્રીસે કોઠામાં ઝગમગતા દીવડાનો
આઠે પહોર અજવાસ;
ચઢ ને ઊતર કરે રગમાં રુધિર
એની આરતી ફરે બારે માસ!
ધજાની પેર મારાં અંગ ઊઠે ને કાંઈ ફરફરતો આનંદ!
⁠હો જી હો ફરફરતો આનંદ...
⁠એ જી રે શ્વાસમાં વાગે શંખ!
૯-૮-’૮૩