કાવ્ય-આચમન શ્રેણી – ચંદ્રકાન્ત શેઠ/૪૬. આ — જે ચાલ્યો, કોના માટે?: Difference between revisions
KhyatiJoshi (talk | contribs) (Created page with "{{SetTitle}} {{Heading|૪૬. આ — જે ચાલ્યો, કોના માટે?| ચંદ્રકાન્ત શેઠ}} <poem> {{Right|[કવિ શ્રી...") |
(No difference)
|
Revision as of 15:24, 29 July 2021
ચંદ્રકાન્ત શેઠ
[કવિ શ્રી મનહર મોદી માટે]
સવાર ચાલ્યો, સાંજે ચાલ્યો, અધરાતે મધરાતે ચાલ્યો;
આટે ચાલ્યો, પાટે ચાલ્યો, પોતાની સોંસરવો ચાલ્યો!
સૂતાં ચાલ્યો, ઊઠતાં ચાલ્યો, સીધો ચાલ્યો, આડો ચાલ્યો;
વાંકુંચૂકું ત્રાંસું ચાલ્યો, બાવનીયે બહારો ચાલ્યો!
તનની તબિયત માટે ચાલ્યો, મનની મહોબત માટે ચાલ્યો;
સૌની સોબત માટે ચાલ્યો, પોતાથીયે ઊફરો ચાલ્યો!
સુખમાં ચાલ્યો, દુઃખમાં ચાલ્યો, દેતાંલેતાં ચાલ્યો, ચાલ્યો;
ગુંજરતો ને ગાતો ચાલ્યો, અતલ મૌનમાં ઊંડો ચાલ્યો!
પાસે ચાલ્યો, આઘે ચાલ્યો, નીચે ચાલ્યો, ઊંચે ચાલ્યો;
પોતાને પણ પાછળ છોડી આરપાર ને અધ્ધર ચાલ્યો!
જોતો ચાલ્યો, ખોતો ચાલ્યો, પોતાને ખેલવતો ચાલ્યો;
દુનિયા સાથે કામ પાડતાં, દૂર દૂર દુનિયાથી ચાલ્યો!
શ્વાસે ચાલ્યો, પ્રાસે ચાલ્યો, છંદ છોડતો છંદે ચાલ્યો;
કવિતાના ભરપૂર કેફમાં હદમાં થઈ અનહદમાં ચાલ્યો!
પોતા માટે ચાલ્યો, અચ્છા! કવિતા માટે ચાલ્યો, અચ્છા!
આ-જે ચાલ્યો, કોના માટે? બતાવ મનહર, ખાંના બચ્ચા!
૩૦-૩-૨૦૦૩
(ભીની હવા ભીના શ્વાસ, ૨૦૦૮, પૃ. ૬૭)