કાવ્ય-આચમન શ્રેણી – નલિન રાવળ/૨૭. રેતપંખી

૨૭. રેતપંખી

નલિન રાવળ

સુક્કાં તીક્ષ્ણ સળગતાં રેત રેતનાં સ્વપ્નો
નીચે
રેત રેતનાં રડતાં નગરો
ઉપર
રેત રેત ને રેત રેતનું રણ

રેતીની આંધી
વચ્ચે
ઊભું
રેતીનું એ ખરતું પંખી

એ
રેતપંખીની રેતીની બે — દિવસરાતની — ખરતી પાંખો,
એ
રેતપંખીની રેતીની બે — સૂર્યચંદ્રની — ખરતી આંખો,
એ
રેતપંખીનાં ખરખર ખરતાં પીંછાંમાંથી ખરખર ખરતી
રેત રેતની વર્ષા
નીચે
સુક્કાં તીક્ષ્ણ સળગતાં રેત રેતનાં સ્વપ્નો
નીચે
રેત રેતનાં રડતાં નગરો.
(અવકાશપંખી, પૃ. ૭૮)