ઋણાનુબંધ/હાઇકુ

હાઇકુ

આસોપાલવ
ના અહીં, દ્વારે ટાંગ્યાં
સ્મિત-તોરણ

• 
  

અંગઅંગ આ
પલળ્યાં, ધોધમાર
સ્મૃતિ વરસાદે

• 
  

જગજાહેર
મારી લવઅફેર—
કવિતા સાથે

• 
  

પવન દોડે
પકડવા પોયણાં
પાણી કંપતું

• 
  

વર્ષાસંગીત
વાદળનાં મૃદંગ—
વીજળી નૃત્ય

• 
  

અમેરિકામાં
બા નથી, ક્યાંથી હોય
તુલસીક્યારો?

• 
  

દરિયો આખો
માછલીનાં આંસુથી
થૈ ગયો ખારો

• 
  

થયો સમય—
કપડે ચોંટ્યું ઘાસ
ખંખેરવાનો

• 
  

પ્રદક્ષિણા તો
ફરી’તી વડે, કાચો
હશે તાંતણો?

• 
  

ભીંતે તડકો
લઈ પવન પીંછી—
ચિત્રો ચીતરે

• 
  

ઢળતી સાંજે
પવન શોધે કૂંચી—
ઢળ્યા ઘાસમાં

• 
  

બેઠા શ્વાનની
લટકતી જીભમાં
હાંફે બપોર

• 
  

રેતી ગણે છે
બે મોજાંઓ વચ્ચેનો
સૂનો સમય

• 
  

સ્થિર થા સ્થિર!
વીનવતો પવન
દીપશિખાને

• 
  

તડકો આવે
બારી વાટે, ચા પીવા
ટેબલ પર

કલરવતું
ઝરણું, ગીચ વૃક્ષો,
ખાલી બાંકડો

• 
  

છટકી ગયો
સમય, મારી સાથે
છેડતી કરી

• 
  

સમીસાંજના
તૃણે લેટે, આળોટે—
કિરણધણ

• 
  

પથ્થરે નહીં—
પગને દગો દીધો
ઘાસ-જાજમે

• 
  

ઊપડે ટ્રેન—
ફરફરી ના શકે
ભીનો રૂમાલ

• 
  

રોજ સાંજના
લપસે છે તડકો
ટેકરી-ઢાળે

• 
  

ઉડાઉ આભે
ખરચી નાખી: બધી
જળકમાણી

• 
  

રેશમપોત
સપનાનું, જાગું ત્યાં
સરકી જાતું

• 
  

કેવો ચોળાઈ
ગયો, પ્રેમ છે તારો
રૂમાલ જેવો!

• 
  

ગમે તેટલી
ઊડતી ધૂળ, કદી
ન મેલાં ફૂલ

• 
  

તારા ઊઠતાં
કંપી ઊઠ્યાં, ગભરુ
શાંત કંકણો

• 
  

ઉપવનમાં
ગીતો ગાતો પવન,
વૃક્ષો ડોલતાં

• 
  

ઉંબરો ઊંચો—
ના ઓળંગી શકતો
શિશુતડકો!

• 
  

પાડોશી બાજુ
ગરતાં પારિજાત—
માળી તટસ્થ

• 
  

સ્પર્શું તમને
પાંપણની કોરથી
ભરમેળામાં

• 
  

શમણે મળો—
તો નહીં વગોવાય
પ્રેમ આપણો

• 
  

જીરવવાને
પતંગિયાનો ભાર—
નમતું ઘાસ

• 
  

કૂણાં તૃણની
અંગે ઓઢણી ઓઢી
ધરા શોભતી

• 
  

કૂંડે સુકાતી
તુલસી, શોધ્યા કરે
બાનાં પગલાં

• 
  

બાળે છે હજી—
સપ્તપદી ફરતી
વેળાનો અગ્નિ

• 
  

તડકે લૂછી
લીધાં, ફર્શ પરનાં
ભીનાં પગલાં

• 
  

પીઠી ચોળાવી
બેઠાં છે ડેફોડિલ્સ
ઘાસમંડપે

• 
  

ના પકડાતી
છટકતી હરિણી—
એવી તો સ્મૃતિ

• 
  

કરચલીઓ
ચ્હેરે ને સ્નેહ પર
પડી તે પડી

• 
  

પાંપણો બંધ
તોય છટકી ગયો
સ્વપ્ન-સંબંધ

• 
  

ભરબપ્પોરે
તડકેસ્નાતા ડાળી
દીસે સોનેરી

• 
  

કાળા ઝભ્ભામાં
રાત, જ્યૂરી તારલા,
દિન આરોપી

• 
  

ઝાકળબિંદુ
ગુલાબપાને, કરે
નકશીકામ

• 
  

તડકો ધ્રૂજે
શિયાળાનો, ઘરમાં
રજાઈ ખોળે

• 
  

પરોઢ થાતાં
પવનની પ્રાર્થના
પર્ણમર્મરે

• 
  

ચૂમી દીધી છે
એવી કે આગ આગ
ભભૂકી ગાલે

• 
  

પરોઢ કરે
નિત કંકુતિલક
આકાશભાલે

• 
  

તડકો કૂદે
ઘાસઘાસમાં, જાણે
પીળું સસલું!

• 
  

સમીસાંજના
ઘાસ ચમેલી કરે
વિશ્રંભકથા

• 
  

ગાગર ભરી
શકું એટલાં, મળે
ઝાકળટીપાં?

• 
  

સાવ નિરાંતે
બેઠું છે તારું નામ
જીભબાજઠે!

• 
  

તડકો સૂતો
ડાળી પર, ફૂલનું
ઓશીકું કરી

• 
  

નર્તન કરે
સાગરમોજાં, પ્હેરી
ફીણ-ઝાંઝર

• 
  

લાવજે એક
દરિયો, જ્યાં તૂટ્યું ન
એકે વહાણ

• 
  

સૂર્યકિરણ
પ્રવેશ્યું પીંછી લઈ
ભીંતો રંગાઈ

• 
  

તડકો ચાલે
અડવાણે પગલે
ઘાસજાજમે

• 
  

વાળ ખેંચતો
દુ:શાસન પવન
શાંત નદીના

• 
  

જળમાં તરી
તરી થાકેલું મીન
ક્યાં જઈ ઠરે?

• 
  

ગોકળગાય
જેમ, વિચાર સરે
મનમાં ધીરે

• 
  

અંધારસ્ટેજે
પવન પખવાજે
સ્નોફ્લેક્સ નૃત્યો

• 
  

ઝલમલતી
કિરણ-માછલીઓ
નિષ્કંપ જળે

• 
  

અમાસ રાતે
ચંદ્ર શોધવા, મળી
તારાની ઠઠ

• 
  

પવન કરે
વાતો, બેવડ વળી
ડાળીઓ હસે

• 
  

ઊડ્યું એક જ
પંખી ને કંપી ઊઠ્યું
આખુંય વૃક્ષ

• 
  

ગાઢા વનમાં
સળવળી, સ્મૃતિની
લીલી સાપણ!

• 
  

ભીનો કાગળ,
ભૂંસાયેલા અક્ષર,
છલકે સ્મૃતિ

• 
  

સૂરજમુખી
સૂરજ સાથે ફરે—
હું દિશાહીન

• 
  

કોલાહલમાં
વાતો કરે નિરાંતે
ચાર નયનો

• 
  

નિહાળ્યાં કરું—
પીઠ ઘસતો ભીંતે
શિશુ-તડકો!

• 
  

ઘડપણનું
બોખું મોઢું વાગોળે
વીત્યો સમય

• 
  

મંજુલ રવે
રણક્યાં કરે, ઋજુ
કરે કંકણો

• 
  

પથારી પર
એની, હું પથરાઉં
ચાંદની થઈ

• 
  

આગને ઠારે
જળ, કોણ ઠારતું
જળની આગ?

• 
  

પુષ્પો નીરખે
નૃત્યો પતંગિયાંનાં—
ઘાસમંડપે

• 
  

પારિજાત ના—
વેરાણાં છે હાઈકુ
કેસરવર્ણાં!