સોરઠી સંતવાણી/ગુપત રસ

ગુપત રસ

ગુપત રસ આ તો જાણી લેજો, પાનબાઈ,
જેથી જાણવું રહે નહીં કાંય,
ઓઘ રે આનંદના કાયમ રહે ને,
સેજે સેજે સંશય બધા મટી જાય —
ભાઈ રે! શૂરવીર થૈને સંગ્રામે ચડવું, પાનબાઈ,
માયલું મન ફરી ઊભું ન થાય;
કવલ ભગતિને તમે એમ પામો, પાનબાઈ,
જેથી જનમ મરણ સેજે મટી જાય. — ગુપત.
પરપંચનાં તોડી નાખો પડળ, પાનબાઈ,
તો તો પચરંગી પાર જણાય;
જથારથ પદને જાણ્યા પછી, પાનબાઈ!
ભાવ કભાવ મનમાં નહીં થાય. — ગુપત.
ભાઈ રે! મેદાનમાં હવે મામલો મચાવો, પાનબાઈ
ભજન કરો ભરપૂર;
ગંગા રે સતી એમ બોલિયાં રે
વરસાવો નિરમળ નૂર. — ગુપત