અર્વાચીન ગુજરાતી કાવ્યસંપદા/જયન્ત પાઠક/ખપે ન ખોટી ચીજ

         ખપે ન ખોટી ચીજ
                  અમને ખપે ન ખોટી ચીજ
                  મનને ખપે ન ખોટી ચીજ.
ચાતક ચહું વરસાદ ગગનથી, નહિ ગરજન, નહિ વીજ.
                           — અમને.

         અઢળક ચહું અંબાર તેજનો,
                  નહીં ઓછાથી રાચું;
         તુજ મુજ પ્રીતના દાવે માગું
                  તારું સકલ, નહીં યાચું.
પૂર્ણ સુધારસ કુમ્ભ પૂનમનો પીવો, ન ઘૂંટડી બીજ.
                           — અમને.

         આ જીવન જમનાના ઘાટે
                  ઘટ ભરનારી ગોપી;
         મોહી પડી છું મોહન જગની
                  મરજાદાને લોપી.
કંઠે કરનો હાર ચહું, ના માદળિયાં તાવીજ.
                           — અમને.