કાવ્ય-આચમન શ્રેણી – મકરન્દ દવે/૪૨. અદીઠો સંગાથ

૪૨. અદીઠો સંગાથ

પગલું માંડું હું અવકાશમાં,
                                 જોઉં નીચે હરિવરનો હાથ,
અજંપાની સદા સૂની શેરીએ
                                   ગાતો આવે અદીઠો સંગાથ. —
                                   જાગીને જોઉં તો કોઈ નથી એકલું.
ભયની કાયાને ભુજા નથી,
                                   નથી વળી સંશયને પાંખ,
ભરોસે ચાલ્યા જે અનભે રંગમાં,
                                   ફૂટી એને રૂંવે રૂંવે આંખ. —
                                   જાગીને જોઉં તો કોઈ નથી એકલું.
ઊંઘતાને માથે ઓળો મોતનો,
                                   ઊંઘતાને પાયે જગની જેલ,
આઘાતે ભાંગે છે કોઈ અહીં ભોગળો,
                                   ને આંસુડે વાવે છે અમરવેલ. —
                                   જાગીને જોઉં તો કોઈ નથી એકલું.

૨૮-૧૨-’૬૭ (સંગતિ, પૃ. ૧૧૦)