કાવ્ય-આચમન શ્રેણી – હરીન્દ્ર દવે/૩૧. તારી સુવાસ

૩૧. તારી સુવાસ

તારી સુવાસ અંગ થકી ઓસરી નથી,
આશ્લેષથી તું જાણે કદીયે સરી નથી.
ફૂલોએ કેમ જાણી હશે આપણી કથા?
મેં તો ચમનમાં વાત કોઈને કરી નથી.
આ રસ્તે આવવાની ઉતાવળ કરો નહીં,
આંખો મેં આખે રસ્તે હજી પાથરી નથી.
સમણું છે એ કહો છો, તો માની લઈશ હું,
મેં તો હજી બે પાંપણો ભેગી કરી નથી.
એને કશું ન કહેશો, ભલા, એનો વાંક ક્યાં?
એ લોકોએ કદીય મહોબ્બત કરી નથી.
૧૬-૩-’૭૨

(ચાલ, વરસાદની મોસમ છે, પૃ. ૨૧૪)