અનેકએક/ક્ષણો... બે

ક્ષણો... બે

૧

ક્ષણ સમય એક અભિન્ન છે
ક્ષણ સમયનો અંશ છે
ક્ષણમાં સમય છે
ક્ષણ નથી સમય છે
સમય નથી ક્ષણ છે
ક્ષણ નથી સમય નથી
આ ક્ષણે
આ ગૂંચમાં વ્યસ્ત છું


૨

શાશ્વતી
પ્રસ્રવે છે
ભંગુર ક્ષણો
જેમ
સમુદ્રમાં બુદ્બુદો છે છતાં
બુદ્બુદ સમુદ્ર નથી
એમ
ક્ષણ સમય નથી


૩

ક્ષણ
સમયની ત્વરાનું
માપ છે
ક્ષણવિલીનતા
વ્યાપ


૪

ક્ષણને
આવતી
પસાર થતી
અટકાવી શકાતી નથી
ક્ષણને
આવતી
પસાર થતી
અટકાવી શકાય છે


૫

ક્ષણો
વીતી ગયાની છલના
રચે છે સ્મૃતિને
અનવરતતા
કલ્પે છે
અનાગતને
ને એમ
ક્ષણો
ત્રિખંડિત થાય છે


૬

ક્ષણમાં
હતું
ન હતું થઈ જાય
ન હતું, હતું
જોજનો, અડોઅડ
કોઈ ક્ષણે
કોઈક ક્ષણે
ક્ષણરહિતતા
અનાવૃત થઈ જાય
ભેદો ભૂંસાઈ જાય


૭

ક્ષણને
રંગ રવ રાગ છે
દંત દંશ દંડ છે
ગંધ ગોત્ર ગમન
અવતરણ આરોહ અવધ છે
ક્ષણેક્ષણને
નિત્ય નૌતમ આવિર્ભાવ
અંત છે


૮

ક્ષણને
ઝીણામાં ઝીણી કર્યા પછી યે
સમય
અવશિષ્ટ છે
ક્ષણનો વિસ્તાર
સમયને આંતરી શકતો નથી
સમયની ગતિ-સ્થિતિહીનતા
ક્ષણના ઉદ્ભવ લયથી
અસ્પૃષ્ટ છે


૯

હજુ યે
ગૂંચ
અકબંધ છે
માત્ર
થોડી ક્ષણો
સરળતાથી
પસાર થઈ