ગાતાં ઝરણાં/હકદાર લાગે છે: Difference between revisions
Jump to navigation
Jump to search
હકદાર લાગે છે
(+1) |
(No difference)
|
Revision as of 01:41, 14 February 2024
નર્યું પાણી જ મારા દર્દનો ઉપચાર લાગે છે,
રડી લઉં છું, મને જ્યારે હૃદય પર ભાર લાગે છે.
દિવસ તો જિંદગીના આંખ મીંચીને કપાયા પણ,
ઉઘાડી આંખથી રાતો કપાતા વાર લાગે છે.
મને બેસી જવા કહે છે, ઊઠે છે દર્દ જ્યાં દિલમાં,
હૃદયમાં દર્દ-રૂપે દર્દનો દેનાર લાગે છે.
હૃદયની આશને ઓ તોડનાર! આટલું સાંભળ :
કમળ આ માનસરમાં ફક્ત એક જ વાર લાગે છે
રુદનની ભીખ માગે છે પ્રસંગો જિંદગાનીના,
કરું છું દાન તેને જે મને હકદાર લાગે છે.
સનાતન રૂપ મારી કલ્પનામાં પણ નહીં આવ્યું,
જીવન-કવિતા! મને તું બુધ્ધિનો વ્યાપાર લાગે છે,
‘ગની’ વીતેલ જીવનનાં સ્મરણ તાજાં થયાં આજે,
ફરી ખખડાવતું કોઈ હૃદયનાં દ્વાર લાગે છે.
૧૯-૧૨-૧૯૪૮