મનોહર ત્રિવેદીનાં કાવ્યો/મોસમનો પહેલો વરસાદ: Difference between revisions
Jump to navigation
Jump to search
મોસમનો પહેલો વરસાદ
(+1) |
(No difference)
|
Latest revision as of 00:47, 4 March 2024
મોસમનો પહેલો વરસાદ પડ્યો, હેય હેય!—
આળસ મરડી ફટાક છાપરાનાં નળિયેથી
દરિયો ફળિયામાં દડ્યો, હેય હેય!–
હેય હેય! નેવાંનાં પાણી–સમેત
વહે અંધારું રે ઝાકમઝોળ
નદીએ તો ઠીક, અહીં છાતીમાં ઊઠે છે
પ્હેલવ્હેલ્લો કોઈ હિલ્લોળ
ગોખેથી સ્હેજસાજ સૂરજ દેખાય : ભીનો
ઘરને ઉજાસ જડ્યો, હેય હેય – !
હેય હેય! વહેલી સવારે લખમીજીનાં
લીલાં પગલાંની જોઉં ભાત
પાંદડીએ પાંદડીએ ઝિલાતી જાય
એની ઘૂઘરીઓ તૂટ્યા–ની વાત
જાસૂદનાં ફૂલ જેમ તારીયે આંખોમાં
કેવો ઉન્માદ ચડ્યો, હેય હેય – !