કંદરા/છળ: Difference between revisions

From Ekatra Wiki
Jump to navigation Jump to search
(+1)
 
(No difference)

Latest revision as of 00:49, 20 March 2024

છળ

રગદોળે પંજા માટીમાં,
ગરજે, ચાટે બચ્ચાંઓને,
રાની પશુ. ગુફામાંથી બહાર આવીને
બગાસું ખાય, ગંધાતા મોઢે
તળાવમાં પાણી પીવા ઊતરે
અને પછી હંફાવે સાબરોને.
કયારેક અડધી રાતે એકલો જ
ચાલ્યો જતો હોય વનમાં
ત્યાં સામેથી કોઈ જીપ આવીને ઊભી રહે તો
આંખે અંધારાં આવી જાય બિચારાને,
એ લાઇટથી.
અને પછી, મોટી ફાળ ભરીને
એક થપાટ મારે અને દોડી જાય
ચાર પગે, પલકવારમાં.
પણ એક વખત, જ્યારે આખાયે વનમાં
કાવતરાભરી શાંતિ છવાયેલી હતી, ત્યારે
ઝાડ સાથે બાંધેલી બકરીનું
બે-બેં સાંભળીને, એ જઈ પહોંચ્યો ત્યાં
અને માંચડો બાંધીને બેઠેલા
બધાના શ્વાસ અધ્ધર થઈ ગયા.
ઝાડ પર બેઠેલા લક્કડખોદના શરીરમાં
લાકડાની ઝીણી ઝીણી ફાંસો ભરાઈ ગઈ.
સૂંઢમાં તળાવ ભરીને નહાતી
હાથણીઓ શાંત થઈ ગઈ.
આ રાની પશુનો માયાળુ પંજો


સ્ફૂર્તિથી ઊંચકાયો.
દૂર સામે છેડે રાઈફલની નાળ ગોઠવાઈ.
આંખો... અંતર.. અંધકાર... દિશા...
નખ... માટી... લાઈટ.. અવાજ...
છળ... કપટ... અને
આમંત્રણ આપતું એક ભરપૂર શરીર.