સિગ્નેચર પોયમ્સ/એક જ દે ચિનગારી – હરિહર ભટ્ટ

એક જ દે –

હરિહર ભટ્ટ

એક જ દે ચિનગારી, મહાનલ!
એક જ દે ચિનગારી.
ચકમક લોઢું ઘસતાં ઘસતાં
ખરચી જિંદગી સારી;
જામગરીમાં તણખો ન પડ્યો,
ન ફળી મહેનત મારી,
મહાનલ એક જ દે ચિનગારી.

ચાંદો સળગ્યો, સૂરજ સળગ્યો,
સળગી આભ-અટારી;
ના સળગી એક સગડી મારી –
વાત વિપતની ભારી,
મહાનલ એક જ દે ચિનગારી

ઠંડીમાં મુજ કાયા થથરે,
ખૂટી ધીરજ મારી;
વિશ્વાનલ! હું અધિક ન માગું –
માગું એક ચિનગારી,
મહાનલ એક જ દે ચિનગારી.