ચાંદરણાં/વિરહ

4. વિરહ

• ‘વિરહ’ એટલે પોતે સર્જેલા ચિત્રને દૂરથી જોયા કરતો ચિત્રકાર.
  
• ‘વિરહ’ એ નિકટની દૂરતાનું નામ છે!
  
• વિરહમાં જે બાદ થયું હોય તે શેષ રહે છે.
  
• વિરહ એ નજીકની દૂરતા અને દૂરતાનું સામીપ્ય હોય છે.
  
• વિરહની દૂરતામાં કોઈ માઈલસ્ટોન નથી હોતા.
  
• વિરહ એટલે ખેતરની માટીને વધારે ‘પક્વ’ કરતું કોરું ચોમાસું.
  
• વિરહ એ દૂર દેખાતી જ્યોતિ છે, ભયસૂચક દીવાદાંડી નથી.
  
• માણસને માણસની, સહરા જેવી તરસ લાગે તે વિરહ.
  
• વિરહમાં ‘વિભક્તિ’ પણ ‘સંધિ’ બની રહે છે!
  
• વિરહ એકદંડિયા મહેલમાં રહે છે!
  
• વિરહમાં દૂરતા છે, પણ તે માપવાની મેઝરટેપ નથી.
  
• પોતાના ચાહવાની ટેવ પાડે છે તેને વિરહનો ભય રહેતો નથી.
  
• વિરહ : અજંપાનો શાંત કોલાહલ.
  
• નજીકનું માણસ જ દૂરતાનો વિરહ આપે છે.