ચાંદરણાં/ધર્મ

28. ધર્મ

• ધર્મ ધંધો બને છે પછી એને બજાર પણ મળી રહે છે.
  
• ધર્મ હવે સરકારોને જીવાડવા-મારવાનું મહત્ત્વનું કામ કરે છે!
  
• ધર્મ નથી પાળતા તેઓ પણ બંધ પાળે છે!
  
• ધર્મ ચાલતો નથી, એ માણસ પર સવારી કરે છે.
  
• બીજો ધર્મ છે એટલે પારકો ઈશ્વર પણ છે.
  
• લાગણી તો પહેલાં પણ હતી, પણ ધર્મ નહોતો એટલે દુભાતી નહોતી!
  
• કમજોર ધર્મ પોતાની આસપાસ દીવાલો ઊભી કરે છે.
  
• માણસને વિભાજિત કરે તે ધર્મ કહેવાય!
  
• ધર્મ નિર્બળ હશે એટલે એનું રક્ષણ કરવું પડતું હશે.
  
• મઝહબી ચશ્મા પહેરે તેને ગોગલ્સનો ખર્ચ બચી જાય!