તારાપણાના શહેરમાં/ખબર પડે: Difference between revisions
Jump to navigation
Jump to search
(+1) |
(No difference)
|
Latest revision as of 02:34, 14 May 2024
ખબર પડે
કાં આશ એકવાર મળે તો ખબર પડે
કાં લાશ એકવાર મળે તો ખબર પડે
મારામાં નહિ તો આપને ગમતું ઘણુંય છે
નવરાશ એકવાર મળે તો ખબર પડે
મેં સાંભળ્યું છે આપની દરિયાદિલી વિષે
ખારાશ એકવાર મળે તો ખબર પડે
વર્ષાથી તરબતર હશે ત્યાં આપનું નગર
ભીનાશ એકવાર મળે તો ખબર પડે
મર્યાદા જાણવા ગયો તો ક્ષિતિજે કહ્યું
આકાશ એકવાર મળે તો ખબર પડે
એકાંતમાં આ કોણ મળી જાય છે મને
અવકાશ એકવાર મળે તો ખબર પડે
એના મરણ વિષે બધી અફવા શમી જશે
બસ લાશ એકવાર મળે તો ખબર પડે