કાવ્ય-આચમન શ્રેણી – મનુભાઈ ત્રિવેદી/મૂળ એક

૮. મૂળ એક

મૂળ એક, એનાં મુખ અનેક હો જી.
ધરતી જોડતી દાંડલી એક જ,
⁠ અગણ પુષ્પ-અભિષેક,
પાંખડી પાંખડીએ ચેતનમય
⁠ પૃથ્વીની પમરે મ્હેક રે;
ભાઈ, મૂળ એક, એનાં મુખ અનેક હો જી.
આભ આષાઢી ઘન-ગોરંભે
⁠ ઝૂકે લ્હેકં લ્હેક,
મોર બપૈયા ચાતક કેરી,
⁠ ભિન્ન અભિન્ન ગહેક રે;
ભાઈ, મૂળ એક, એનાં મુખ અનેક હો જી.
કોઈ વન પૂજે, કોઈ મન પૂજે,
⁠ તન પૂજે અતિરેક,
પૂજન-શબ્દ વિવિધ કિંતુ મહીં
⁠ અકલ એક અહાલેક રે;
ભાઈ, મૂળ એક, એનાં મુખ અનેક હો જી.

⁠(રામરસ, પૃ. ૨૪)