મંગલમ્/ફાગણ આયો રે

ફાગણ આયો રે

ફાગણ આયો ફાગણ આયો ફાગણ આયો રે,
ઋતુઓ કેરો રાજન આયો ફાગણ આયો રે.

⁠વસંત ક્યાં છે, કોનાં કૂજન?
⁠ક્યાં દીઠાં ભમરાનાં ગુંજન?
⁠રસઘેલાંનાં કૌમુદી કૂજન
કોઈ ન લાયો રે, સળગતો ફાગણ આયો રે.

⁠ક્યાં ફૂલવાડી કોયલડી ક્યાં?
⁠કૂએ નવાણે પાણી ખૂટ્યાં
⁠માએ રડતાં બાળક મૂક્યાં
સ્નેહ સુકાયો રે, ભયંકર ફાગણ આયો રે.

⁠પ્રભુ મંદિરિયે પુષ્પ હિંડોળા
⁠દ્વાર ઊભાં ક્ષુભિતોનાં ટોળાં
⁠હૂ હૂ શોર કરે વંટોળા
નટવ૨ નાચ્યો રે, ધગધગતો ફાગણ આયો રે.

⁠થૈ થૈ થૈ થૈ લઈ કર તાળી
⁠નવ નાચે ગોપી મતવાલી
તાંડવ નાચ્યો રે, મહાનલ ફાગણ આયો રે.