બાબુ સુથારની કવિતા/હું ઇચ્છું છું કે

૧૨.

હું ઇચ્છું છું

હું ઇચ્છું છું
⁠કે
મારા અવસાન પછી
મારી નનામીને
ચાર ઈયળો ઊંચકીને
ચાલતી હોય,
દોણી, બીજું કોઈ નહીં
⁠પણ
એક તીતીઘોડો
લઈને ચાલતો હોય
ડાઘુઓમાં થોડાંક
કીડા હોય
મંકોડા હોય
પેલી રાતી રાતી ઝેમોલો હોય
ઊધઈ પણ હોય
⁠અને
ઘોઘા પણ હોય
મારી સ્મશાનયાત્રામાં
પતંગિયાં નહીં જોડાય તો
મને ગમશે,
જ્યારે હું નાનો હતો ત્યારે
એમણે મને ખૂબ હેરાન કર્યો છે.
પણ, એમને બદલે
જો થોડાંક દેડકાં જોડાશે
⁠તો મને ખૂબ ગમશે
એમનું ડ્રાઉં ડ્રાઉં
મારા દેહમાં નિરાધાર બની ગયેલી
મારી ભાષાની બારાખડીને
આશ્વાસન આપશે.
(‘સાપફેરા’ એક)