મંગલમ્/સર્વોદયનું હાર્દ

સર્વોદયનું હાર્દ

હાં રે મારે સર્વોદયનું હાર્દ
⁠સમજી જીવનમાં વણવું;
હાં રે નવયુગનું સર્જન આજ
⁠શ્રમજીવી થઈને કરવું…

તન તોડી ખેતર એ ખેડે
⁠ધાન ઉગાડી જગ જિવાડે.
હાં રે એવા ખેડૂતનું અહેસાન
⁠મારે કેમ કરી ભૂલવું? ⁠…હાં રે.

કાળી ઘોર મજૂરી કરતો,
⁠મિલ મહીં મજદૂર પિસાતો,
હાં રે એનો દુઃખ ભર્યો સંસાર
⁠જોતાં બેસી શું રહેવું? …હાં રે.

દિન આખો એ ગલીઓ વાળે
⁠જીવન ભોગે જગ અજવાળે,
હાં રે એવા ઋષિઓનું શુભ સ્થાન
⁠પાછું સમાજમાં લાવવું …હાં રે.

માનવતાના મજબૂત પાયા,
⁠શ્રમજીવીઓથી છે જ પુરાયા,
હાં રે એ છે સત્ય સનાતન સાર,
⁠સમજી જગને સમજાવું …હાં રે.

— પૂનમચંદ શાહ