ભરત વિંઝુડાની ગઝલસંપદા/થયો જ નહીં

૩૬
થયો જ નહીં

રંગ કાળો, પીળો થયો જ નહીં,
એના દિલમાં દીવો થયો જ નહીં!

બાકી રાખી દીધું વરસવાનું,
એણે ને હું ભીનો થયો જ નહીં!

એક પથ્થરને મેં તરાસ્યો બહુ,
પણ કદી એ હીરો થયો જ નહીં!

કાગડા હોય છે બધે કાળા,
કંઈ અનુભવ બીજો થયો જ નહીં!

માત્ર મારા જ માપમાં છું હું,
સહેજ ઊંચો, નીચો થયો જ નહીં!

ક્યાંક આગળ હતો હું રસ્તા પર,
એથી એનો પીછો થયો જ નહીં!

સૂર્ય કિરણોની જેમ ચાલું છું,
કોઈ રસ્તો સીધો થયો જ નહીં!

(તો અને તો જ)