કાવ્ય-આચમન શ્રેણી – વેણીભાઈ પુરોહિત/૨૦. ટેરવાં

૨૦. ટેરવાં

ટેરવાં મૂંગાં ને એનો લાખેણો લલકાર
કસબી! લાખેણો લલકાર.

ટેરવાંથી નાચે મારા
તંબૂરાના તાર ઝીણા,
નાચે રે વીણાના ઝનનન
ઝનન ઝન ઝંકાર–
કસબી! ઝનન ઝન ઝંકાર. – ટેરવાંo

છૂટે રે અંબોડે ધૂણે
જેવી કોઈ જોગણી રે,
ટેરવાંથી મંજીરાં એમ
નાચે થૈથૈકાર–
કસબી! નાચે થૈથૈકાર. – ટેરવાંo

ટેરવાંની ટીચકીથી
તબલાંનો તાલ નાચે,
તોડા ને મોડાથી થાપી,
ધીંગો રે થડકાર–
કસબી! ધીંગો રે થડકાર – ટેરવાંo

ટેરવાંથી નાચે છૈયું,
હોઠ નાચે, નાચે હૈયું,
ટેરવાંની મૂંગી મૂંગી
સંગનામાં સાર–
કસબી! સંગનામાં સાર. – ટેરવાંo

ટેરવાંથી નાચે મારા
બેરખાના પારેપારા,
ટેરવાં દેખાડે અનહદ
સોહમ્ ને સંસાર –
કસબી! સોહમ્ ને સંસાર – ટેરવાંo

ટેરવાં છે કામનાં ને
ટેરવાં છે રામનાં રે,
જેવી જેની તરસ એવો
છલકે પારાવાર—
કસબી! છલકે પારાવાર. – ટેરવાંo
(દીપ્તિ, ૧૯૫૬, પૃ. ૩૧-૩૨)