અર્વાચીન ગુજરાતી કાવ્યસંપદા/વેણીભાઈ પુરોહિત/અમારા મનમાં એવું હતું કે

અમારા મનમાં એવું હતું કે

વેણીભાઈ પુરોહિત

અમારા મનમાં એવું હતું કે
         તમને ઓરતા થાશે :
                  — કે નેણલાં ન્હાશે :
                  — વીંઝણલા વાશે
કે લાગણી ધીમું ધીમું ગાશે,
હો રસિયા! અમારા મનમાં.

અમારા મનમાં એવું હતું કે
         આવશે ઘેર હલકારો :
                  — દિવસનો તારો
                  — કે વાત — વણઝારો :
ખબરની ખારેકડી દઈ જાશે,
હો રસિયા! અમારા મનમાં.

અમારા મનમાં એવું હતું કે
         ગોઠડી કરશે ચીલા :
                  — કે રથના ખીલા,
                  — કે વનની લીલા :
કે પગલાં ાઘેથી પરખાશે,
હો રસિયા! અમારા મનમાં.

અમારા મનમાં એવું હતું કે
         ડુંગરિયે પડઘા પડશે :
                  — કે સીમમાં ઢળશે,
                  — કે મેડીએ ચડશે :
કે હીંચકે જાદુઈ ઝોલાં ખાશે,
હો રસિયા! અમારા મનમાં.