બાળ કાવ્ય સંપદા/ભમરડો

ભમરડો

લેખક : નિર્મળાબહેન દાણી
(જ. વ. નથી...)

⁠લાલ, પીળો ભમરડો મારો
⁠ભમ્મર ભમ્મર ભમતો...(૨)

નાનકડો છે અંગે તોયે મસ્ત બનીને ફરતો,
ટચૂકડી લોઢાની ધારે, ધરતી સાથે લડતો,
ધૂળ બધીયે દૂર હટાવી, ખાડો ઊંડો કરતો.
⁠– લાલ પીળો ભમરડો મારો....

દોરીના દાગીના પહેરી નર્તન રૂડો કરતો,
નાના દોસ્તો જોવા મળતા, વાહ ! ભમરડો ફરતો.
⁠– લાલ પીળો ભમરડો મારો...

બાલુડાની યુદ્ધભૂમિ પર, વિજ્યી વહેલો બનતો,
ભમરડાની હરીફાઈમાં ઇનામ લઈ ઘર ફરતો
⁠– લાલ પીળો ભમરડો મારો...