દિલ દર્દથી ધરાઈ ગયું, હાય શું થયું?
દુખનું ગળું કપાઈ ગયું, હાય શું થયું?
પ્હેલો પ્રસંગ છે કે હૃદય આજ ગાય છે!
ભયમાં જીવન મૂકાઈ ગયું, હાય શું થયું?
આ બદનસીબ આંખ, આ ગોઝારું જાગરણ,
રજનિથી પણ રડાઈ ગયું, હાય શું થયું?
જ્વાળારૂપી જીવનની ઉપર જગનું સાંત્વન-,
વાયુ બનીને વાઈ ગયું, હાય શું થયું?
એકાંતમાં જઈને રડ્યો એ દુખે તો હું,
વાતાવરણ છવાઈ ગયું, હાય શું થયું?
આ હવે ગણાય છે એકાંતની પળો,
આખું ગગન ગણાઈ ગયું, હાય શું થયું?
ઊંડાણમાં હૃદયના તપાસી જુઓ ‘ગની’,
પાછું કવન રચાઈ ગયું, હાય શું થયું?
૧૦-૪-૧૯૫૨