કાવ્ય-આચમન શ્રેણી – હરિકૃષ્ણ પાઠક/૫૧. ‘સાક્ષર બોતેરી’માંથી

૫૧. ‘સાક્ષર બોતેરી’માંથી

કોણ કોલસે કરે દલાલી? કપરો કારોબાર,
કાવ્યકલાનો કરતાં વદથી સુ.દ. થતાં શી વાર?

• 
  

લાઠીદાવ રમી જાણે પણ રમત કરે તે લા.ઠા.
ફેલ-ફિતૂરની કરે ઠેકડી, ભર્યા ભર્યા બે કાંઠા.

• 
  

મધ્યકાળ કે સ્વાતંત્ર્યોત્તર – ચર્ચામાં શી હાણ?
વીર નરોત્તમ તડેપેંગડે, દેખો સદા પલાણ…

• 
  

બોરી તો સાકરની પાછી મધ-સગરમાં બોળે,
નથી વિરોધી એક્કે જન્મ્યો, નાહકનો ક્યાં ખોળે?

• 
  

રઘુવીર આજન્મ રાજવી, ભલી રાજવટ કરે;
હવે શબ્દથી અદકી ચિંતા સમાજની ઉર ધરે.

• 
  

રણઝણતી રૂમઝૂમતી ભાષા રાય મધુને વરી,
રંગ-રાગનો રસિયો ઠાકર કમાલ કંઈ કંઈ કરી.

• 
  

હસે-હસાવે તેથી હર્ષદ, કરે કશાં તોફાન;
તરવાડીની ત્રેવડ જોગાં મળજો એને માન!

(જળમાં લખવાં નામ, પૃ. ૩૪૯-૩૫૪)