અનુનય/વહેતાં પાણીનું ગીત

વહેતાં પાણીનું ગીત

વ્હેતાં પાણીને હવે વાળવાની વાત
⁠અને ખાળવાની વાત બધી મેલો;
નવસેં નદીઓની આ તો રેલ અને છેલ,
⁠નથી પાદરના નેળિયાનો રેલો!

પડતાં પાણીમાં કોરાં કરવાની વાત
⁠ફોરાં ગણવાની વાત બધી મેલો!
ધારા ધારામાં અહીં વાદળાં વણાય
⁠અને વસ્તર વાયુનાં ભીંજેલાં!

ઘૂઘવતાં પાણીમાં તરવાની વાત
⁠પાર કરવાની વાત બધી મેલો;
પ્હાડો ને ઝાડો પછાડતી આ તાણ—
⁠આ તો ઠેઠથી આવેલ કોઈ ઠેલો!

અંકાશી હાથ લિયે પ્રથમીને બાથ
⁠તયે અળગાં રહેવાની વાત મેલો;
પ્રલ્લેનાં પૂર જાય દોડ્યાં ચકચૂર
⁠ભલે આપણોય ભવ જાય ભેળો!

૧૯-૭-’૭૫