ગુજરાતી નારીસંપદા : કવિતા/ઉષા
ઉષા
ચૈતન્યબાળા દિવેટિયા
⯐
આવે ઉષા જગમંદિરે સાહેલડી,
પગલીઓ ધીમી પાડે રે.
વિશ્વને વધાવવા કુંકુમથાળ ગ્રહી
આનંદે ઉર ભરે રે... પગલીઓ૦
સૃષ્ટિનાં સૌભાગ્ય ઊગ્યાં, ઉષા આવી મન્દિરે,
અજવાળ્યું જગત તેજે
મધુર એના આગમને... પગલીઓ૦
ઓઢી રંગચૂંદડી રાતી રઢિયાળી એણે,
વિહરે વિશ્વવ્યોમમાં ઘડીકમાં
છુપાતી એ...પગલીઓ૦
સોહાગભર્યા આભમાં થાતી અદૃશ્ય એ,
રેલે પ્રકાશ સુભગ પામે રવિતેજને.
પગલીઓ ધીમી પાડે રે૦
***