અર્વાચીન ગુજરાતી કાવ્યસંપદા/જયન્ત પાઠક/ચિતારો

ચિતારો

જયન્ત પાઠક

અજબ મિલાવટ કરી
ચિતારે રંગપ્યાલીઓ ભરી!

એક લસરકે ઊગી નીકળ્યાં
         જંગલ જંગલ ઝાડ;
ટપકે ટપકે ફૂટી નીકળ્યા
         ધરતીપટથી પ્હાડ!
                  ઘટ્ટ નીલિમા નરી. — ચિતારે.

જરાક ખંખેરી પીંછી ત્યાં
         ફૂલને લાગી છાંટ;
ફૂંક મારતાં ફેલાયા શા
         સાગર સાત અફાટ!
                  જલરંગે જલપરી! — ચિતારે.

લૂછતાં વાદળપોતે ઊઘડ્યા
         ઇન્દ્રધનુના રંગ;
રંગરંગમાં લીલા નિજની
         નીરખે થઈને દંગ!
                  ચીતરે ફરી ફરી! — ચિતારે.