અર્વાચીન ગુજરાતી કાવ્યસંપદા/જગદીશ જોષી/છેલકડી

છેલકડી

જગદીશ જોષી

નાનકડી શેરીને છેલકડી પહેરાવો એવી આ ડેલી એક લાગશે.
અણિયાળી મોજડીમાં ચમક્યો સૂરજ:
                           એમાં પાલવ સફાળો મારો જાગશે.

         લ્હેરિયાતા સાફાનું છોગું છકેલ
                  મારી ભીની પાંપણમાં મરકે,
         પોતીકા થડકારા ભૂલીને દલડું તો
                  રોઝડીના ડાબલા શું ફરકે:
ગરકેલો મોર મારો પીંછાંના માંડવડે
                  એકાદો ટહુકો તો માગશે!

         આંખોમાં આમતેમ પારેવાં ઊડે
                  ને કમખામાં દીવડાની જ્યોત,
         હુક્કાની જેમ મને પી જાજો વા’લમા
                  કે હું જ કરું મારી ગોતાગોત:
તારા આવતાંની સાથે અહીં કોણે જાણ્યું કે
                  મારું આયખું પરાયું થઈ ભાગશે!