એકોત્તરશતી/૨. પ્રાણ

૨. પ્રાણ (પ્રાણ)

આ સૌંદર્યમય વિશ્વમાં મને મરવાની ઇચ્છા નથી. હું માનવોમાં જીવવા ઇચ્છું છું. આ સૂર્યનાં કિરણોમાં, આ પુષ્પિત કાનનમાં, અને જીવન્ત હૃદયમાં હું સ્થાન પામવા ઇચ્છું છું. ધરતી ઉપર કેટકેટલાં વિરહ અને મિલન-હાસ્ય અને અશ્રુ-ભરી પ્રાણની લીલા સદા લહેરાયા જ કરે છે,—માનવનાં સુખદુઃખનાં ગીતો ગૂંથીને અમર ભૂમિ રચવાની મારી ઇચ્છા છે. પણ જો તે ન કરી શકું, તો જ્યાં સુધી જીવું ત્યાં સુધી તમારી વચ્ચે જ સ્થાન પામું એમ ઇચ્છું છું, અને તમે ચૂંટશો એમ કરીને સવારે અને સાંજે નવાં નવાં સંગીતનાં ફૂલો ખીલવ્યા કરીશ. તમે હસતે મોઢે એ ફૂલ લેજો અને ત્યાર પછી હાય, જો એ ફૂલ સુકાઈ જાય તો ફેંકી દેજો! નવેમ્બર, ૧૮૮૬ ‘કડિ ઓ કોમલ’

(અનુ. નગીનદાસ પારેખ)