મધ્યકાલીન ગુજરાતી કાવ્યસંપદા/મીરાં પદ (૧)

પદ (૧)

મીરાં

ઝેર તો પીધાં છે
ઝેર તો પીધાં છે જાણી જાણી, મેવાડા રાણા!
ઝેર તો પીધાં છે જાણી જાણી.
કોયલ ને કાગ રાણા એક જ વર્ણા રે;
કડવી લાગે છે કાગવાણી.
ઝેરના કટોરા જ્યારે રાણાજી મોકલે રે;
તેનાં બનાવ્યાં દૂધપાણી.
સાધુનો સંગ મીરાં છોડી દિયો રે;
તમને ગણીશું પટરાણી.
બાઈ મીરાં કહે પ્રભુ ગિરિધરના ગુણ
મને રે મળ્યા સારંગપાણિ.
મેવાડા રાણા, ઝેર તો પીધાં છે જાણી જાણી.