બરફનાં પંખી/બરફનાં પંખી

બરફનાં પંખી

અમે બરફના પંખી રે ભાઈ, ટહુકે ટહુકે પીગળ્યા.
⁠લૂમાં તરતો ઘોર ઉનાળો
⁠અમે ઉઘાડે ડિલે
⁠ઓગળતી કાયાનાં ટીપાં
⁠કમળપાંદડી ઝીલે
ખરતા પીંછે પડછાતી બપ્પોર મૂકીને નીકળ્યા!
અમે બરફનાં પંખી રે ભાઈ, ટહુકે ટહુકે પીગળ્યા
⁠લીલા-સૂકા જંગલ વચ્ચે
⁠કાબરચીતરા રહીએ
⁠નભમાં ઊડતા સાંજ પડે તો
⁠સોનલવરણાં થઈએ
રાત પડે ને ડાળ ઉપરથી કોયલ થઈને ટહૂક્યા
અમે બરફનાં પંખી રે ભાઈ, ટહુકે ટહુકે પીગળ્યાં.

***