તારાપણાના શહેરમાં/રેખા
Jump to navigation
Jump to search
રેખા
ભૂંસાઈ સમજણની રેખા
સમજાવો કારણની રેખા
મૃગજળ અમને ઓછું પડશે
કોઈ વધારો રણની રેખા
શૈશવ આવી સાદ ન પાડે
થરથરશે ઘડપણની રેખા
ટપકાં... ટપકાં... ટપકાં… ટપકાં
બનતી ગઈ કણકણની રેખા
મર્યાદા જો છૂટવા મથશે
શું કરશે લક્ષ્મણની રેખા?
હું તો મનગમતું જોવાનો
છો ને રહી દર્પણની રેખા
ક્ષિતિજ ટુકડે ટુકડા થઈ ગઈ
તૂટી ગઈ પાંપણની રેખા
કોણ ‘ફના’ સંબંધ તપાસે
વેગળી છે હર ક્ષણની રેખા