બાળ કાવ્ય સંપદા/તડકો (૩)
Jump to navigation
Jump to search
તડકો...
લેખક : રવજી ગાબાણી
(1972)
ડુંગર ઉપર ચડતો તડકો,
કેવું મીઠું હસતો તડકો !
ડુંગર ઉપર...
પગ નહીં પાંખ નહીં,
જોવા એને આંખ નહીં;
ઊબડખાબડ રસ્તે જાતો,
તોય કદી ક્યાં પડતો તડકો !
ડુંગર ઉપર...
ધીમે ધીમે ઢાળ ચડતો,
ટોચે જઈ વિરમતો;
ઢાળ મળતાં જુઓ કેવો,
દોટ મૂકીને દડતો તડકો !
ડુંગર ઉપર...
ક્યારેક ઝાંખો ક્યારેક પાંખો,
ક્યારેક કૂણો ક્યારેક તીખો;
ક્યારેક લીલોછમ્મ ને વળી,
ક્યારેક સોનાવરણો તડકો !
ડુંગર ઉપર...
દિવસે ફરતો થઈને દાદો,
સાંજે રહેતો માંદો માંદો;
સમી સાંજમાં ઓગળી જાતો,
બપોરનો એ ભડકો તડકો !
ડુંગર ઉપર...