કંદરા/રોમાન્સ

રોમાન્સ

મારા ઘરમાં એક ઈનડોર પ્લાન્ટ છે.
ઘરનો એક મોટો, ખાલી ખૂણો
એના કારણે ભરાઈ જાય છે.
મને એની સાથે ખૂબ સરસ અન્ડરસ્ટેન્ડીંગ છે.
મારું હાસ્ય એના માટે સૂરજ છે.
મારાં આંસુ એના માટે પાણી છે.
હું તાળું ખોલી ઘરમાં પ્રવેશું છું.
અને લાગે છે જાણે, મારી ઘરની રોજિંદી ક્રિયાઓ ઉપરાંત,
ઘણું બધું એ મારા વિશે જાણે છે.
ક્યારેક મને એનાથી ખૂબ સંકોચ થાય છે.
અને હું એની ધરાર ઉપેક્ષા પણ કરું છું.
છતાં મારા પલંગ પાસે જ રાખેલો એ છોડ
મારા સપનામાંયે આવે છે.
ક્યારેક એ મને ઊંઘમાંથી જગાડે પણ છે.
અને પછી રંગબેરંગી ફૂલો ઉગાડીને બતાવે છે.
અડધી રાતે, બંધ બારણે થતા
અમારા આ રોમાન્સની
ઘરે આવનારા કોઈ મહેમાનોને ખબર નથી પડતી.
❏