કાવ્ય-આચમન શ્રેણી – પ્રિયકાન્ત મણિયાર/૨૮. દિવસે ડૂબું

૨૮. દિવસે ડૂબું

પ્રિયકાન્ત મણિયાર

દિવસે ડૂબું રાતના ઊગું
કોઈ વેળા હું આભમાં પૂગું.
એકલવાયા તારલા તગે છેક છેવાડે બૂઝે,
કર પ્રસારી સ્હેજ સંકોરું તેજથી પાછા ઝૂઝે;
તમરાંના ત્રમકારથી ઝાઝું
બોલતું આખું આભ તો મૂંગું.
દિવસેo

એક સપાટે લસરી આવ્યો લસતી ચાંદની ધારે,
ભૂલમાં હું તો ઊતરી આવ્યો રાતરાણીના ક્યારે;
મ્હેક મારામાં એમ ભળી કે
ઘેનમાં હું તો મુજને સૂંઘું!
દિવસેo
(આ નભ ઝૂક્યું, પૃ. ૭૩)