મંગલમ્/વાયરા વસંતના

ઋતુ અને પર્વ ગીતો
વાયરા વસંતના

વાયરા વસંતના વાય રે એક ડોલે રે મંજરી.
ડોલે છે મંજરી, ફોરે છે મંજરી
ફાગણના સંદેશા પાઠવે છે મંજરી
⁠કામણ કરીને તું રાચતી રે — એક ડોલે છે મંજરી
હૈયાના કોડ એને કંઈ કંઈ હિલોળે
માનવના દિલડાને રંગે ઝબોળે
⁠આતમના ગાનને લાવતી રે — એક ડોલે છે મંજરી
સૂરજના તેજે દિલને તપાવતી
અંતરની ફોરમે સહુને પમરાવતી
⁠કોકિલની બંસરી બજાવતી રે — એક ડોલે છે મંજરી
કૂણી કળીઓમાં જાદુ જગાવતી
લાડકા અનિલને હેતથી ઝુલાવતી
⁠બાજંતી ગાજંતી ખંજરી રે — એક ડોલે છે મંજરી
આનંદના પારાવારે ખેલતી રે
એક નાનકડી મંજરી
⁠વાયરા વસંતના વાય રે — એક ડોલે છે મંજરી.