રમણીક સોમેશ્વરની કવિતા/આપણી ભાષા
Jump to navigation
Jump to search
૬૧. આપણી ભાષા
૧
બાળા ગોળીનું ઘારણ
અને તન્દ્રાનું મારણ
છેવટે તો આપણું ધારણ
આપણી ભાષા
૨
આપણા ગભરામાં
ઝબકતું અજવાળું
આપણી ખીણોમાં
ગૂંજતો નાદ
પહાડો વચ્ચે
પડઘાતો સાદ
જળ થળ વાયુ આગને
અંડોળતું આભ
આપણી ભાષા
૩
આપણે ઓઢાડેલાં
બધાં આવરણ ઉતારી
રોજે રોજ
આપણી ભીતરના
અચંબા ઉઘાડતી
આપણી ભાષા
૪
બારાખડી વિનાની
બધી જ બોલીઓ
અને બધી જ ભાષાઓની
બારાખડીઓનો
ઊછરતો લય
આપણી ભાષા
૫
સુકાયેલી જીભ
અને
ચોળાયેલો કાગળ લઈ
બેઠા હોઈએ ટેબલ પાસે
ત્યારે
આપાણી ભીનપને
ફણગાવી ફણગાવી ને
આપણને
તાજા રાખતી
આપણી ભાષા