હાલરડાં/હાલો વા'લો રે.
હાલો રે વા'લો રે કાન કરસન કાળો
હરિને હીંચકો વા'લો!
શામળી સૂરત શામળો વાલો હાં-હાં-હાં
રંગમાં રૂપાળો,
માતા જશોદા એમ જ કે' મારો
મોરલી ધજાળો!
ભાઈ ભાઈ, મોરલી ધજાળો!
હાં...હાં મોરલી ધજાળો!
ઓળોળોળો હાલ્ય હાલૂડા હાલ્ય
- હાલો રે વા'લો રે૦
હતું ઈ તો છતું કીધું હાં-હાં-હાં
કાનજી, તારું કામ;
વારિ ને વરમાંડ ડોલ્યાં,
મેવાડો મસ્તાન!
ભાઈ ભાઈ, મેવાડો મસ્તાન!
હાં હાં મેવાડો મસ્તાન!
ઓળોળોળો હાલ્ય હાલ્ડા હાલ્ય!
- હાલો રે વા'લો રે૦
પરથમ તો ધોબીડાં લૂટ્યાં હાં-હાં-હાં
જોયું મથુરા ગામ
મામા કંસને મારતાં કાંઈ
વરત્યો જેજેકાર!
ભાઈ ભાઈ, વરત્યો જેજેકાર!
હાં...હાં વરત્યો જેકાર!
ઓળોળોળો હાલ્ય હાલૂડા હાલ્ય!
— હાલો રે વા'લો રે૦
પાતાળે જઈને કાના હાં-હાં-હાં
નાથ્યો કાળીનાગ,
પોયણ કરે પાંદડે કાંઈ
પોઢ્યા દીનોનાથ!
ભાઈ ભાઈ, પોઢ્યા દીનોનાથ!
હાં...હાં પોઢ્યા દીનોનાથ!
ઓળોળોળો હાલ્ય હાલૂડા હાલ્ય!
- હાલો રે વા'લો રે૦
દોટ મેલીને દડો લીધો હાં-હાં-હાં
વનમાં પાડી વાટ;
માતા જશોદાએ હાલરડું ગાયું
ઊગમતે પરભાત!
ભાઈ ભાઈ ઊગમતે પરભાત!
હાં...હાં ઊગમતે પરભાત!
ઓળોળોળો હાલ્ય હાલૂડા હાલ્ય
- હાલો રે વા'લો રે૦
ચણ્યા કેરો છોડ મગાવું હાં-હાં-હાં
ઓળા પડાવું;
બાળા કાના, છાનો રેને
ગૂંજો ભરાવું!
ભાઈ ભાઈ, ગૂંજ ભરાવું!
હાં...હાં ગૂંજો ભરાવું
ઓળોળોળો હાલ્ય હાલૂડા હાલ્ય
-હાલો રે વા'લો રે૦
શેરડી કેરો સાંઠો મગાવું હાં-હાં-હાં
પાળીએ છોલાવું;
બાળ કાના, છાનો રે ને,
ગૂંજ ભરાવું!
ભાઈ ભાઈ, ગૂંજ ભરાવું!
હં હાં ગૂંજાં ભરાવું!
ઓળોળોળો હાલ્ય હાલૂડા હાલ્ય
- હાલો રે વા'લો રે૦
શામળી સૂરત શામળો વાને હાં-હાં-હાં
રંગમાં રૂપાળો;
માતા જશોદા એમ જ કે'
મારો મોરલી ધજાળો!
ભાઈ ભાઈ, મોરલી ધજાળો!
હાં...હાં મોરલી ધજાળો!
ઓળોળોળો હાલ્ય હાલૂડા હાલ્ય-
હાલો રે વા'લો રે
કાન કરસન કાળો
બાળાને હીંચકો વા'લો