વહેલી સવારે
પતિ માટે તાજી માછલી ખરીદવા બજારમાં આવેલી
એ ગૃહિણીનો ઊંઘરેટો ચહેરો જોઈને
મને સહેજે વિચાર આવ્યોઃ
રાત્રે એ આ મૃત માછલીની જેમ જ
પડી રહેતી હશે ઠંડીગાર.
તેનો પતિ તેના શરીરના કાંટા વીણતો હશે
તેના શરીરમાંથી નીકળતાં ઘરેણાંથી અંજાઈ જતો હશે
અને એ રાતના સમુદ્રમાં વિલીન થઈ જતી હશે.
બપોરે પોતાના ઘરની અગાશી પર
માછલી સૂકવતી એ સ્ત્રી
તડકામાં નાચતી સોનપરી જેવી લાગે છે.
ઘણી વાર હું એને જોઉં છું
એના ઘરની પાછળ બનાવેલી એક નાનકડી તળાવડીમાં
માછલીઓને ખાવાના ટુકડા ફેંકતી.
મોં ખોલીને ટોળે વળતી માછલીઓને એ કંઈક કહેતી હોય છે.
મેં સાંભળ્યું છે કે માછલી રાંધતી વખતે એ કાયમ
રસોડાનું બારણું બંધ કરી દે છે.
એની રસોઈનો સ્વાદ સૌ વખાણે છે
પણ કોઈને કળાતી નથી એ ગુપ્તતા.
હું જોઈ શકું છું
રસોડાના એ બંધ દરવાજાની આરપાર.
માછલીને કાપીને એમાં મસાલા ભરતી વખતે
એના ચહેરા પર એક અજબ કૂરતા છવાયેલી હોય છે.
જાણે પોતે જ પોતાને મારતી હોય
ને ફરી સ્વાદિષ્ટ બનાવતી હોય એવી.
હું ઓળખું છું
એ વિજેતા ગૃહિણીના
ઊંઘરેટા ચહેરાને.