બાળ કાવ્ય સંપદા/હું ફૂલપરી મજાની

હું ફૂલપરી મજાની

લેખક : મણિલાલ શ્રીમાળી ‘મિલન’
(1957)

વન-ઉપવનથી ઊતરી આવું... હું ફૂલપરી મજાની
હું ફૂલપરી મજાની...

ફૂલડાં જેવાં ભૂલકાંને હું નિજ સપનાંમાં આવું,
રંગબેરંગી ફૂલડાંની સુવાસ મજાની લાવું,
હું ફૂલપરી મજાની...

મારી પાંખે બેસાડી હું દરિયો પાર કરાવું,
ઊંચે ઊંચે ઊડી ઊડી ગગન સેર કરાવું,
હું ફૂલપરી મજાની...

ફૂલોનો શણગાર સજી તમને બાગે દોડાવું,
વિવિધ રંગી પતંગિયાંની પાંખો હું પકડાવું,
હું ફૂલપરી મજાની...

રાતે મીઠી નીંદરમાં હું સપનાં મીઠાં બતાવું,
સવારમાં ઊઠો તે પે’લાં છૂમંતર થઈ જાવું
હું ફૂલપરી મજાની...