અથવા અને/કૉફીના કપવાળું સ્ટીલ લાઇફ

કૉફીના કપવાળું સ્ટીલ લાઇફ

ગુલામમોહમ્મદ શેખ

આછા અંધારા ઓરડામાં
પહોળા માથાના કપમાં હલાવેલ કૉફીમાં
ધીમે ધીમે આછરે
બારીનું ઝાંખું ધોળ, કાળા સળિયા, કથ્થાઈ ભૂરું આકાશ
અને એના પર ઊડતા
દિશાભૂલ્યા ચામાચીડિયાનું એક કૂંડાળું.
ઘૂંટડા સાથે હું વિશ્વની ઘણી ઘટનાઓને પી ગયો.
છાપું નાખ્યું માછલીના કાંટાવાળી પ્લેટ પર.
કૉફીના કપમાં પડી રહી
નિર્લજ્જ, વણઓગળી સાકર.

માર્ચ, ૧૯૬૩
અથવા