અર્વાચીન ગુજરાતી કાવ્યસંપદા/પ્રિયકાન્ત મણિયાર/કૃષ્ણ-રાધા
કૃષ્ણ-રાધા
પ્રિયકાન્ત મણિયાર
આ નભ ઝૂક્યું તે કા'નજી
ને ચાંદની તે રાધા રે.
આ સરવર જલ તે કા'નજી
ને પોયણી તે રાધા રે.
આ બાગ ખીલ્યો તે કા'નજી
ને લ્હેરી જતી તે રાધા રે.
આ પરવત શિખર કા'નજી
ને કેડી ચડે તે રાધા રે.
આ ચાલ્યાં ચરણ તે કા'નજી
ને પગલી પડે તે રાધા રે.
આ કેશ ગૂંથ્યા તે કા'નજી
ને સેંથી પૂરી તે રાધા રે.
આ દીપ જલે તે કા'નજી
ને આરતી તે રાધા રે.
આ લોચન મારાં કા'નજી
ને નજરું જુએ તે રાધા રે!
(આ નભ ઝૂક્યું, પૃ. ૩૧)
પ્રિયકાન્ત મણિયાર • આ નભ ઝૂક્યું તે કા'નજી • સ્વરનિયોજન: અજીત શેઠ • સ્વર: વૃંદગાન