અર્વાચીન ગુજરાતી કાવ્યસંપદા/બાલમુકુન્દ દવે/હોળી મહિનાની વિજોગણ

The printable version is no longer supported and may have rendering errors. Please update your browser bookmarks and please use the default browser print function instead.

હોળી મહિનાની વિજોગણ

બાલમુકુન્દ દવે

આગળ મોર્યા મોગરા ને પછવાડે ગલગોટ,
સવળા વાતા વાયરા, એની અવળી વાગે ચોટ!
         ભુલકણા એ શું નહિ તુજ ભૂલ?
         ભુલકણા એ શું નહિ તુજ ભૂલ?

ખીલ્યાં કેસૂ ખાખરે, એની વગડે વગડે આગ,
ફૂલડે ફૂલડે ફરી વળે મારું મન જાણે મધમાખ!
         ભુલકણા એ શું નહિ તુજ ભૂલ?
         ભુલકણા એ શું નહિ તુજ ભૂલ?

હોળી મહિનો હુલામણો, ઘેર નારી બાળે વેશ,
હું પૂછું નિર્દે નાવલા! તમે કેમ ગમે પરદેશ?
         ભુલકણા એ શું નહિ તુજ ભૂલ?
         ભુલકણા એ શું નહિ તુજ ભૂલ?

રાતે વસમી ચાંદની ને દા’ડે વસમી લૂ!
વસમી વિરહની શારડી, મન વિચાર કરજે તું
         ભુલકણા એ શું નહિ તુજ ભૂલ?
         ભુલકણા એ શું નહિ તુજ ભૂલ?

←

અમાસની મધરાત

શ્રાવણ નીતર્યો

→